Vetrhus bluesband og den glitrande vokalisten Helge Tverdal i aksjon. Til helga spelar dei på Rosendal Fest.

Musikkhelg i Rosendal

Til helga vert Rosendal Fest arrangert for tredje gong. – For oss er dette eitt av vårens høgdepunkt. Vi er veldig glade for at vi har klart å få til ein veslebror til Musikkfestivalen, seier Snikkeri-sjef Eli Kvalvågnes.

I år har festivalarrangørane Snikkeriet og Turisthotellet fått handelsstanden i Rosendal med på laget. Laurdag vert det Fest i Gato med marknad, matservering, pluss musikalsk underhaldning frå ein scene midt i sentrum. Men Rosendal Fest startar allereie kvelden før. Fredagskvelden kan publikum velja om dei vil høyra E-76 på Rosendal Turisthotell eller Dag Bergesen band på Snikkeriet.

Bergesen og Tone-Lise

Artikkelen held fram under annonsen.

– Dag Bergesen Band er eit blues/bluesrock-band med mange funky nyansar i spelestilen. Bandet er kjent for å få god kontakt med publikum. Dette er eit hæla-i-taket-bluesband som spelar både eigne låtar og gamle klassikarar, seier Kvalvågnes.

Denne gongen har bandet med seg Tone-Lise Jonassen frå Halsnøy som gjestevokalist.

– Ho er ein fantastisk vokalist som passar perfekt inn i bandet, rosar festivalarrangøren.

Bygderockbandet E-76 frå Telemark stoppar også den gule, lange Chevroleten i Rosendal for å spela på Rosendal Turisthotell same kvelden.

– I fjor hadde bandet vore på vegen i nærare 27 år, og tre av medlemmene har vore med frå starten. I desse dagar jobbar dei med nytt tekstmateriale for innspeling, melder Rosendal Turisthotell.

Musikksti

Laurdagen kan publikum følgja ein musikksti frå Gato og opp i Nerhuskjellaren der Jazzverket spelar om ettermiddagen. Tidleg på kvelden vert det gratis intimkonsert med Roger Stangervåg på Snikkeriet, før Vetrhus Blues Band spelar ut i dei seine nattetimar.

– Vetrhus har i dag si beste besetning nokon gong, og på ein konsert med dei kan du oppleva individualister i halsbrekkande stunt, samt driv og samspel av ypparste klasse. Det kan ofte bli litt «sirkus», men det er tøft og rått, akkurat sånn som vi likar det, heiter det i pressemeldinga frå bandet.

Artikkelen held fram under annonsen.

Laurdag kveld vert det også konsert med Ni Liv på Turisthotellet. Bandet har nett sleppt sitt sjuande studioalbum. «Broder» er spela inn med heile bandet live i eit stort tømmerrom i Nesbyen.

– Tekstane til Jon Solberg har gjeve denne plata eit litt mørkare preg, og gjev oss eit usminka blikk på livet og den tida vi lever i. Håp er likevel eit gjennomgåande tema, heiter det i pressemeldinga frå Turisthotellet.

Snikkeri-sjef Kvalvågnes seier at ønsket om ei bygd som samlar seg om musikken siste helga i mai er i ferd med å oppfyllast.

– Vi gler oss, og håpar publikum møter opp, seier Kvalvågnes som gler seg til ein musikalsk fest kring fleire scenar i bygda.

Vetrhus bluesband og den glitrande vokalisten Helge Tverdal i aksjon. Til helga spelar dei på Rosendal Fest.