Ministerbesøk i Kvinnherad

Kulturminister Linda Helleland (H) var imponert over det ho fekk sjå då ho besøkte Baroniet Rosendal og møteplass for integrering på fredag.

Etter litt kluss med vegsperringar på Lofthus kom kulturministeren seg til Baroniet Rosendal via luftvegen. Der venta ordførar Peder Sjo Slettebø, Helleland sin politiske rådgjevar Maria Kristine Göthner, rådmann Odd Ivar Øvregård, Anne Grete Honerød og Reidar Nedrebø.

– Sjå der kjem ho, og tenk kor mykje av den fine Kvinnherad-naturen ho har fått sett, sa Honerød.

Fem minuttar seinare var kulturministeren på plass, ein time bak skjema, men klar for dagens første besøk.

 

Set Norge på kartet

Her venta ei ærverdig omvising på baroniet og slottslunsj saman med dei ovannemnte, fylkesdirektør for kultur og idrett i Hordaland Per Morten Ekerhovd og styreleiar i Baroniet Rosendal Tove Kristin Karlsen. Og Helleland skrytte over det dei får til på baroniet.

– Baroniet var veldig flott. Eg er utruleg imponert over det dei har fått til når det kjem til formidling av kunst og kultur og korleis dei klarar å skapa merksemd rundt det. Baroniet Rosendal er ikkje berre viktig for Rosendal og Kvinnherad, men er òg med på å setja Norge på kartet internasjonalt når det kjem til kunst og kultur, seier Helleland.

 

– Digge det

Etter ein betre lunsj på baroniet var eit møte med Kvinnherad Røde Kors og møteplass for integrering det neste på agendaen. I blackboxen i kulturskulesenteret fekk kulturministeren og ordførar Peder Sjo Slettebø servert tre fine kulturelle innslag, ein melodiøs marimbakonsert frå kulturskuleelevar og to songinnslag frå to deltakarar av møteplassen for integrering. Initiativtakar-duoen Elisabeth Berg Hass og Vigdis Gammelsæter fortalte tankane bak møteplass for integrering, før Abdul Izaz på norsk fortalte kva møteplassen har hatt å seia for han.

– Det er veldig fint å sjå at dette kjem ut av eit frivillig initiativ, det digge eg. Det er her eldsjeler som har sett i gang ein prosess ettersom dei har sett behovet for det. Samstundes gjorde Abdul si historie eit veldig fint inntrykk, det er tydeleg at dette er eit positivt tiltak og eg håper mange andre kommunar kan ta etter og læra av det, seier Helleland.

Etter besøket i Kvinnherad reiste kulturministeren vidare til Bømlo der ho opna Mostraspelet «I ei slik natt».