Mikro bryggeri opnar ølutsal

Neste laurdag opnar Mykle Mikrobryggeri gardsutsal for ølet sitt. Seinare same kveld blir det ølsmaking og føredrag på Oska.

I februar gjekk ekteparet Margit og Reinhard Lund-Mikkelson ut med planane om å etablera eit bryggjeri på garden deira øvst i Omvikdalen. Jamt og trutt har paret nådd nye milepålar, både i form av naudsynte godkjenningar og produktutvikling. Siste laurdagen i oktober skal dei opna ølutsalet på garden. No er fire ølsortar klare til sal.

– Me er klare med ein pale ale som heiter «Putlo», ein kölsch som me har døypt «Drøseøl», og american blonde som me kallar «Dalsvatnet» og til slutt ein IPA som me kallar «Sipa», som er ei forkorting av Sunnhordlands-ipa, fortel Reinhard Lund-Mikkelson.

 

Prøvesmaking

Dei første sala har dei likevel gjort.

– Me hadde våre første kundar i september. Tilbakemeldingane til no har vore veldig positive, seier ølgründeren.

Han og kona skrir til verket med skrekkblanda fryd.

– Me leverer frå oss eit produkt som me har lagt sjela vår i, og ynskjer direkte tilbakemeldingar frå kundane. Og sidan me berre sel via vårt eige utsal, får me direkte kontakt med kundane våre, og får dermed halde ein god dialog med dei, forklarer han.

På kvelden etter at utsalet har opna, får Mykle Mikrobrygeri overta Oska for å fortelja om arbeidet med ølproduksjonen, og i tillegg gje publikum høve til å smaka på dei fire ulike ølsortane.