Desse kvinnheringane har vore sterke bidragsytarar i Søfteland sitt opprykk til 5. divisjon. F.v Midtbaneduoen Åsmund Voster og Mats Mo, trenar Raymond Pedersen, omskolert lynving Kenneth Veastad og back Tarjei Tjeldflåt. Foto: Privat

Kvinnheringar feira opprykk

Fersk i trenaryrket styrte husnesguten, Raymond Pedersen, Søfteland-skuta direkte opp i 5. divisjon, tre rundar før slutt.

Med på laget finn vi fire andre med tilhøyrsle i kommunen. Tarjei Tjeldflåt frå Valen, Mats Mo frå Sunde, Kenneth Veastad frå Herøysundet og Åsmund Voster frå Sunde er alle sterke bidragsytarar i troppen til det Os-baserte laget.

 

Artikkelen held fram under annonsen.

14 på rad

Godt styrt av Raymond Pedersen har laget slått det som har vore av motstand sesongen gjennom. Etter tap og uavgjort i sesongens to fyrste kampar, står dei grøn og kvitstripete no med 14 sigrar på rad når det står igjen to kampar. Dei kunne etter sigeren mot Fri måndag 25. september, etter fem år i toppen av 6. divisjon, endeleg jubla for opprykk.

– Det var veldig kjekt at klubben endeleg klarte opprykket. Eg skal ikkje seia om det var tilfeldig at det skjedde under mi leiing eller ikkje. Men det er i alle fall hyggeleg å vera mannen som gjer det, seier Raymond.

 

Kan møta gamle kjende

Etter opprykket kan kvinnheringane i Søfteland møta velkjendt motstand komande sesong. Om realiteten blir slik at Trio, Halsnøy og Rosendal hamnar i same divisjonen, er det ei pulje Raymond veldig gjerne ønskjer å hamna i.

– Eg og spelarane har alle fortid i Trio, så det ville vore spesielt, men samtidig veldig kjekt å få moglegheita til å møta dei. Dei er òg eit lag eg kjenner veldig godt, så eg skulle alltids klart å lura dei. Men vi får verkeleg håpa at dei klarar seg. Kvinnherad trenger eit lag i 4. divisjon, så det får halde at vi møter Halsnøy og Rosendal, seier Pedersen.