Kvinnherad-duell i cupen

I kveld er det klart for ein vassekta Kvinnherad-duell i den TV-sendte NM-kvartfinalen mellom Kongsvinger og Sandefjord.

Med Ronny Holmedal som assistenttrenar og Kjetil Berge sentral i trebackslinja til Sandefjord og Ørjan Røyrane som raudkledd indreløpar på motsett banehalvdel, er det ein skikkeleg Kvinnherad-duell som ventar i cupens kvartfinale.

– Eg gler meg stort. Det vert nok veldig spanande, både for oss spelarar og publikum. Vi har tapt to kampar mot Kongsvinger denne sesongen, så dei vert nok å sjå på som favorittar. Men vi har klokketru på det vi gjer, og kjem til å gje dei kamp til døra, seier den rutinerte forsvarsspelaren Kjetil Berge.

 

Sjeldan kost

Fjorårets cupfinalist, då i forsvaret til Sarpsborg 08, synest det er ekstra kjekt at ein så viktig kamp er prega av fleire kvinnheringar.

– Det er sjeldan kost at to frå Kvinnherad møtest i ein kvartfinale i NM i fotball. I tillegg er Ronny assistenttrenar, så kommunen er veldig godt representert. Det betyr at vi allereie er sikra minst ein kvinnhering i semifinalen, eit scenario eg trur det er lenge til vi får oppleva igjen, seier Berge.

 

Begge trur på siger

Han trur laga, som begge kjempar om opprykk til Tippeligaen denne sesongen, vil servera publikum og Tv-sjåarar rundt om i landet ein open og underhaldande kamp.

– Sjølv om Kongsvinger har hatt taket på oss innbyrdes denne sesongen, er det vi som ligg best an i OBOS-ligaen. Eg har tru på ein spanande og gøy kamp, men om eg skal koma med eit tips så trur eg vi vinn 2-1, seier Berge.

Noko Ørjan Røyrane sjølvsagt ikkje er einig i.

– Der trur eg nok Kjetil tek feil. Eg har stor tru på at vi kan slå Sandefjord igjen, og håpe verkeleg at det er eg som jublar etter kampen, så kan dei trøysta seg med at det framleis er ein kvinnhering i cupen, seier Røyrane.

Han trur Kongsvinger vinn 2-0 mot Berge og laget Ørjan sjølv har spelt for i ni år.

– Det er alltid litt spesielt å møta Sandefjord for min del, eg spelte der lenge og sit igjen med mange gode minner der frå. Men no satsar eg på at vi vinne kampen, og går vidare til semifinalen, sluttar Røyrane.