Kjempa mot overmakta

Rosendal heldt stand i 83 minutt før Ingvald Johnsen scora første målet for Halsnøy på Rosendal stadion i kveld. Martin Lygre sikra siger på bortebane i det 90.minutt.

Kampen enda 2-0 til Halsnøy, og det er trenaren til Halsnøy veldig godt nøgd med.

- No kan vi ta sommarferie med godt samvit. Det viktigaste for oss i dag var å vinna. Viss vi ikkje hadde vunne denne kampen hadde vi hamna midt på treet, men no er vi med blant dei seks beste. Då har vi litt å spela på i haust, seier KJell Henning Berntsen etter kampen i kveld.

Han er nøgd med laginnsatsen, og syntest Halsnøy spelte roleg og kontrollert bak.

-Kjetil Eide var god. Helge Mehammer var god på midtbanen. Eg synest vi var mykje betre enn Rosendal, men vi fekk ikkje mål før på slutten. Vi var klart betre, og hadde sikkert ballen 70-80 prosent av tida, seier trenar Kjell Henning Berntsen (t.h. på biletet).

Trenar for Rosendal Kjetil Helvik meiner Rosendal kjempa heroisk mot Halsnøy.

-Men vi blir litt for baktunge, og var litt for puslete i duellane då Halsnøy fekk inn dei to måla, slår han fast.

Han meiner likevel Rosendal hadde nokre reelle sjansar.

-Vi hadde nokre store høve til å stela med oss poeng, sjølv om Halsnøy alt i alt var best. Det er fortent siger til bortelaget, men eg synest vi kjempa bra, konkluderer Helvik.