(Illustrasjonsfoto)

Ingen personskader i tunnelulukka

I 19-tida fredag kveld vart det varsla om ei alvorleg trafikkulukke i Folgefonntunnelen. Det heile ser no ut til å ha gått ganske bra.

– Det vart store materielle skader, men heldigvis ingen personskader å snakka om i ulukka, seier politioverbetjent Sigurd Børve.

Ut frå det politiet veit om hendingsforløpet skal ein bil som kom køyrande frå Kvinnherad ha kome over i feil køyrebane, og støytt saman med ein bil som kom frå Odda. Bilen fortsette og kolliderte med ein bil nummer to før han hamna på taket.

Artikkelen held fram under annonsen.

– Det er meldt om store materielle skader, men ikkje om personskader. Ein person vart sendt til Odda sjukehus for sjekk. Det er nesten utruleg at det gjekk så bra. Det var også eit barn i den eine bilen, fortel Børve.

Fordi bilen frå Kvinnherad kom over i motsett køyrebane, vert det teke rutinemessig blodprøve av føraren med tanke på promille, og førarkortet vert beslaglagd inntil vidare. Tunnelen vart stengd etter kollisjonen, men opna att kring 20.30 fredag ulukkeskvelden.