Historieforteljing med kufte

Torsdag fortalte 43 strikkekufter kvar si soge under strikkekvelden til bygdekvinnelaget.

– Kvar einaste jakke er kome med ei eiga historie. Dei fleste er er gamle – frå både før og etter krigen. Nokre har kanskje arva nokon av dei, og det er plagg her som er rekonstruksjonar etter funn som er gjort. Kanskje me må setja i gang og gjera ei skikkeleg registrering på desse kulturminna, fortel Marianne Hovda Gausvik.

Mellom dei førtitals kuftene hang ei stripete strikkejakke, med nokre skinnande, gjenbrukte knappar.

– Mor strikka, og så hadde ho ikkje råd til knappar. Så då spretta ho dei ut av uniforma pappa Greger Gregersen brukte til sjøs, smiler Signy Lygre, som no er eigar av kufta.

Denne kvelden var kring 35 yngre og eldre kvinner samla for å strikka og eta kvelds i lag.

– Det vert litt færre no når det vårast. Tidlegare har me gjerne vore oppe i 60 her. Her har damene stilt med strikkeoppskrifter på alt mogeleg, inkludert på bikiniar frå omtrent før krigen, ler Gausvik.

Kuftene på veggen i gymsalen i Omvikdalen var stort sett frå strekninga Åkra – Omivkdalen – Mauranger.

– Det ligg heilt sikkert mange fleire kringom i heimane. Då me såg alle blir hengde opp, slo det oss at dette måtte dokumenterast. Så får tida visa kva meir me skal gjera ut av dette, sluttar Gausvik.