Gigantlam i Omvikjo
Med ei fødselsvekt på 7,4 og 7,2 kilo er truleg tvillinglamma som vart fødde i Omvikjo på tysdag av dei tyngste i sitt slag.
– Eg har aldri vore borti noko så stort nokon gong. Ikkje på ein tvillingfødsel, seier bonde Stig Omvik.
Etter det han sjølv har funne ut, ligg vekta på tvillinglam på fire til fem kilo.
Artikkelen held fram under annonsen.
– Eg har forhøyrt meg litt i eit forum som eg er med i. Der var det ein som hadde hatt eit lam på 7,7 kilo, men det var enkeltlam, ikkje tvillingfødsel.
– Korleis såg mora ut før fødselen?
– Ho såg ut som ho hadde svelgt ei tønne. Men så var det to gode sleggjer ho pressa ut òg. Dei kom to dagar på overtid, og fostera veks godt den siste tida, seier Omvik.
Om det er godt gras eller godt stell som gir store lam, har bonden sjølv tenkt å la vera usagt. Arvematerialet får mesteparten av skulda.
– Eg kjøpte ein kåra vêr på Stord i fjor, og det må ha vore ein god mutasjon i lag med han. Han gav oss nokre klubbar av nokre lam i fjor òg.
Har du vore ute for tyngre lam enn dette? Ta gjerne kontakt med Grenda på haavard@grenda.no!