Frivillig bomstasjon i Ølve
– Me håpar me får inn nok pengar til å gjera livet betre for nokon, seier Mathilde Vikane.
Ølve Montessoriskule stilte fredag og måndag med eigen bomstasjon til inntekt for barn på flukt. Ønsket om å gjera noko vart til under morgonsamlinga til skulen førre måndag.
– Elevane hadde fått med seg nyhenda om alle båtflyktningane i Middelhavet, og fleire hadde sett bilete av Aylan (3-åringen som drukna). Dei var klare på at me måtte samla inn pengar, og når det kjem frå barna, så hiver me oss rundt med ein gong, fortel rektor Hein Bondevik.
Artikkelen held fram under annonsen.
Etter idémyldring i fellesskap, enda elevar og lærarar på at ein kombinasjon av bøsser og kiosksal kunne gje litt inntekter til eit godt formål.
– Ei stund ut i diskusjonen var det ein som sa «Bompengeaksjon!». Så me fann ein måte å ruta givarar innom stasjonen, fortel Bondevik.
Gjer inntrykk
Mathilde Vikane (11), Julie Bjørkelund (8) og Oliver Ljones Lønningen har brukt helga til å gå rundt med bøsser.
– Me har fått inn mykje pengar på bøssene. Og når me hadde bomstasjonen på fredag selte me også kaffi, saft, vaflar og bollar. Det fekk me også inn pengar på, seier trioen.
Flyktningkatastrofen som utspelar seg i Syria og Middelhavet, har sett spor i unge sinn.
– Eg synest det er leit at dei har det slik at dei må flykta frå landet sitt. Eg har sett nokre klipp av det på nyheitene, seier Mathilde.
Artikkelen held fram under annonsen.
– Eg får ikkje lov å sjå av mamma. Ho seier eg kan få mareritt av det, forklarer åtte år gamle Julie.
Rektor Bondevik hadde sett som mål å få inn 3.000 kroner.
– I bomstasjonen på fredag fekk me inn 2.700 kroner. Og i bøssene er det mykje pengar. Så eg trur me får mykje meir enn det Hein trudde på, seier Oliver.
Han var forresten arkitekten bak bommen, laga av eit par gamle stylter og noko rekved.
– Bommane fungerte, dei, melder han tilfreds.
Håpar å hjelpa
Pengane elevane får inn skal sendast vidare til å Redd Barna, øyremerkt til aksjonen «Barn på flukt».
Artikkelen held fram under annonsen.
– Eg håpar dei brukar pengane fornuftig, til å kjøpa mat og sånt. Og så håpar eg me får inn nok pengar til å gjera livet betre for nokon. Eg syns me bør hjelpa andre, seier Mathilde.
– Det er gøy å jobba slik som dette. Det er litt nyttig, og så blir det mindre skuletid på oss, oppsummerer Julie, som altså såg at slike aksjonar kjem fleire til nytte.