Fiska etter rømt laks

Stian Hesvik og Roger Næss kom eins ærend frå Bergen for å fiska etter rømt laks. Eller 200-lappar som dei sjølve identifiserte fisken som.

– Me har nett vore i Bergadalen og levert inn 28 laksar som me fiska på Mundheim onsdag ettermiddag. No er me her på Gjermundshamn for å prøva fiskelykka, smilte Roger Næss og Stian Hesvik på torsdag.

Kompisane tok med seg fiskestenger og slukar og suste i veg då dei høyrde varselet om dusør for laksane.

– Pluss at det er jo alltid er kjekt å få fisk, gliste Roger.

– Me jobbar begge offshore, og plar å stikka ut og fiska litt når me er i land. Men me er ikkje superivrige elles. Men her er det jo 200-lappar som sym rundt i sjøen. Og dei vil me jo ha tak i, fortalte dei mellom kasta.

 

5000 tatt

Grenda var innom i Bergadalen på torsdag, og såg mengder med laks liggja i konteinarar på parkeringsplassen til anlegget.

– No er det viktigaste for oss å få fiska opp så mykje som råd frå fjorden. Me har sjølve mykje folk i sving for å fiska opp, og har åtte lag fordelte på strategiske plassar frå Tysnes og innover i Hardangerfjorden. Det var om lag 36.000 laks som rømte frå merden. Førebels har me fått opp litt over 5000, sa samfunnskontakt ved Lingalaks, Kjetil Hestad til Grenda på fredag.

Lingalaks er veldig glade for å få betalt ut så mykje finnarløn som mogeleg, og oppmodar privatpersonar om å koma seg på fjorden med fiskeutstyr.

– Det er dei som har fått både 30.000 og 40.000 i finnarløn så langt. Skal ein få finnarløn for fisken, så må han leverast i Bergadalen. Men om ein vel å behalda fisken som matauk, så set me likevel stor pris på om me kan få ein e-post om fangsten, slik at me kan halda tal på kor mange laks som er fiska opp, bed Hestad.

 

120 tonn

Han minner om at det er forbod for privatpersonar mot å bruka flytegarn.

– Me er i tett dialog med Fiskeridirektoratet og Fylkesmannen, og har fått eit spesialløyve til våre lag som får bruka flytegarn til fisket, seier han.

I alt var det over 90.000 fisk som stod i merden før rømminga.

– Det er 120 tonn fisk som er komen seg ut. Det er klart at dette er fleire millionar i omsetnad for oss som er borte, men det er ikkje det viktigaste no. Dette er fisk som skal vera i merd, ikkje i fjorden. Så du får ta med deg ei stong du òg, og reisa på fiske, sluttar Hestad.