Filmklubben flyttar til Uskedalen

Rosendal Filmklubb opnar årets sesong med framsyningar både fredag og søndag. Samstundes har dei permanent flytta til Smakifrå Oska sine lokale i Uskedalen.

– Vi er kjempespente på å byrja med visningane i Uskedalen, og har for anledninga investert i eit flott lerret og god lyd. Alt er derfor tilrettelagt for ei god filmhelg, opplyser restauranteigar Roy Lervåg i ei pressemelding.

Filmklubben tilbyr to filmar i helga. I morgon kveld står «Le Havre» på programmet. Det vert karakterisert som ein hjartevarm og morosam film av den finske kultregissøren Aki Kaurismäki.

– «Le Havre» er ein hyllest til franske filmar frå ei svunnen tid, men er også eit håpefullt og aktuelt humanistisk verk, vert det opplyst.

Animasjon

Søndag er det barna sin tur. Før søndagsmiddagen blir servert kjem Pixar/Disney-animasjonen «Modig» på lerretet.

– Det er ein film om den dyktige bogeskyttaren Merida. Ho er den impulsive dottera til kong Fergus og dronning Elinor, og er fast bestemt på å gå sine eigne vegar i livet. Her er prinsesser, hekser, kongar og dronningar, gretne gamle gubbar, og sjølvsagt ei dyrisk forbanning, lokkar pressemeldinga.