Kjetil Berge gler seg til sundagens cupfinale. (foto: Frank Githmark)

Får gutedraumen oppfylt

Sundag får Kvinnherad sin andre representant i ein cupfinale i fotball for menn, begge oppvaksne på Valen. Og Kjetil Berge går for gull.

18 år etter at Håvard Lunde vart cupmeister med Vålerenga, håpar Kjetil Berge å bli det same med Sarpsborg 08. Den tidlegare valebuen får no oppleva det han drøymte om då fotballkarrieren starta på grusbanen i Porsvik.

– Dette er gutedraumen. Det var ein av mange store draumar eg hadde då eg sto og triksa under lyktestolpen ved grusbanen i Porsvik. Samstundes som eg sto å sparka i grusen på Valen, var eg i draumane med på dei heilt store kampane. Og eg har vore heldig som har fått vera med i gamet lenge, så eg har fått opplevd mykje. Men dette er cupfinalen, den største enkeltkampen i norsk klubbfotball. Så det blir heilt spesielt, seier Kjetil Berge frå treningsleiren i Gøteborg.

Artikkelen held fram under annonsen.

 

Trur på siger

I finalen skal Berge og Sarpsborg 08 opp mot Rosenborg, årets seriemeister i Tippeligaen. Eit lag dei måtte sjå seg slått av i begge kampane denne sesongen. Men Berge trur at alle gode ting er tre, og at dei kan slå tilbake no når det verkeleg gjeld.

– Vi er ikkje nøgd med å berre nå cupfinalen. Vi skal vinna den. Men vi møter formidabel motstand i Norges desidert største og beste lag, så vi må opp på vårt beste for å ta dei. Men vi går for å sjokkera Rosenborg med det vi er best på, nemlig angrepsfotball. Tenk kor sjukt det hadde vore og reist tilbake til torget i Sarpsborg der 20.000 elleville sarpingar venta for å hylla deg. Det hadde vore fantastisk, seier Berge.

 

Lada opp i Gøteborg

Som opplading reiste Berge og Sarpsborg 08 på treningsleir til Gøteborg. Det for å koma seg litt vekk frå Sarpsborg, men òg for å få best mogleg opplading til storkampen.

– Vi skal vera her til fredag. Så reiser vi til Lillestrøm fredag kveld og blir der fram til sundagen. Det for å få best mogleg opplading fram til kampen, både med tanke på gode treningsfasilitetar, men òg for å koma oss litt vekk og få fred og ro, seier Berge.

Artikkelen held fram under annonsen.

 

Ei fantastisk reise

34-åringen er no inne i sin 8. sesong i Sarpsborg, og har vore med på heile den eventyrlege reisa klubben har hatt. Då han kom til klubben, som den gong heitte Sparta Sarpsborg, var dei eigentleg klare for 2. divisjon. Men på grunn av at eit anna lag vart tvunge ned som følgje av juks, berga dei plassen.

– Det har på mange måtar vore eit eventyr. Det som er ekstra gøy er at eg har fått vera med på alt. Eg har vore assisterande trenar, jobba i marknadsavdelinga, vore kaptein og i dag er eg spelande fysisk trenar. Det har vore ei heilt fantastisk reise som eg håpar vi no kan krona med eit cupgull, seier Berge.

 

Godt førebudd

I siste treningskamp før sesongen pådrog Berge seg ein kraftig hovudskade. Så kraftig at han blei sett ut av spel i tre månadar.

– Det var ein dårleg start for min del. Eg mista sesongens tolv fyrste kampar, men på grunn av fleire skadar i laget, blei eg nærast kasta direkte frå sofakroken og inn på banen. Det var tungt i starten, og det tok litt tid før kroppen var tilbake i den standarden den bør vera.

Artikkelen held fram under annonsen.

Det var nok til at forsvarsklippen noterte seg for 1180 minutt fordelt på 15 kampar i Tippeligaen. Men før karrierens høgdepunkt er han tilbake i storform.

– Eg er tilbake i god fysisk form, og er så klar til kamp som eg kan vera. Så vonleg blir eg å sjå i startellevaren på sundag, seier Kjetil Berge.