Erna valde Uskedalen

President Obama og FN sin generalsekretær Ban Ki-Moon vil i år få eit vakkert julekort med motiv frå Uskedalen i posten. Med helsing frå statsminister Erna Solberg.

At den norske statsministeren sender ut julekort til kollegaer og vener rundt om i verda, er inga nyheit. Men i år vart sjølve framsidemotivet valt ut etter ein open konkurranse.

– Fyrste året sendte eg eit bilete av regjeringa, fint oppstilt. Men i fjor vart eg kontakta av friluftsråda i Norge, som spurde om vi kunne laga ein konkurranse med fine naturmotiv -og opplevingar, sidan 2015 er Friluftslivets år. Dette synest vi var ein så god idé at vi likegodt bestemte oss for å starta ein stafett mellom fylka, fortel statsminister Erna Solberg i ein telefonsamtale med Grenda.

Direkte på Norgesglasset på NRK P1 trekte ho lodd om kva fylke årets motiv skulle vera frå. Der vann Hordaland.

– Er det ein ting Hordaland er, så er det fotogent, smiler Solberg, som opplyser at 70 flotte bilete var med i kåringa.

 

Blåtonar

Vinnaren er altså frå Uskedalen, nærare bestemt Fjellandsbø. Fotograf er Inga Tveito.

– Sjølvsagt fekk vi dei obligatoriske motiva frå Bryggen i Bergen og frå Hardanger. Men eg fall for dette flotte biletet med blåtonar frå Uskedalen. Eg synest dette var det vakraste motivet. Det er jo sånn med meg, at eg fell for blåtonar, seier Solberg.

 

Les meir om saka i morgondagens utgåve av Grenda.