Dugnad på Blådalshytta

Den nye Blådalshytta er i ferd med å reisa seg. På laurdag vert det arrangert dugnad for å mellom anna setja opp panel innvendig.

Lokale entusiastar og Interesselaget Vardhaugselet er som kjent i ferd med å reisa ei ny turisthytte i Blådalen. Den nye Blådalshytta ligg 790 meter over havet, like ved Grøneviksvatnet.

– Det står Svartavatnet på kartet, men det er feil, opplyser Jarle Fossheim i arbeidsnemnda.

Komande laurdag inviterer han til dugnad på hytta.

– Då skal vi fyrst og fremst setja opp panel innvendig. Men det er mykje som skal gjerast, og vi treng folk til å hjelpa oss med det. Interesserte kan melda seg til meg, seier Fossheim.

 

Hems

Anlegget består av to bygg. Hovudhytta har ei grunnflate på 30 kvadratmeter. Ho er allereie ferdig utvendig og isolert innvendig. Hytta får ein hems med god plass til overnattingsgjester, i tillegg vert det truleg sett inn nokre senger. Skykkja er 10 kvadratmeter stor. Der vert det toalett og lager for utstyr og ved.

– Arbeidet har gått veldig bra så langt. Om vi vert heilt ferdige i haust avheng av kor mange som melder seg til å jobba framover, seier Fossheim.

 

Innfallsport

Vêret vil nok òg spela inn. I slik høgde kan vinteren koma kva dag som helst, og i går tidleg var det nok i nærleiken av minusgrader i området. Når hytta står klar, vonar utbyggjarane at folk vil nytta seg av det nye tilbodet.

– Ho ligg på ein nydeleg plass. Staden er ein flott innfallsport til mange fine turar, slår Jarle Fossheim fast.