Breane våre minkar dramatisk

Bondhusbreen har smelta tilbake med heile 303 meter sidan 2000, medan Gråfjellsbreen ved Folgefonna hadde ein tilbakegang med 120 meter på to år. Saman med Bødalsbreen ved Jostedalsbreen er det den breen som har hatt størst tilbakegang i Noreg.

– Det er veldig trist og vemodig å sjå at breane minkar, seier senioringeniør ved NVE Hallgeir Elvehøy.

For første gong har areal- og lengdeendringar for alle breane i Noreg blitt kartlagt. Brearealet har blitt redusert med 11 prosent dei siste 30 åra, noko som inneber at 326 km2 av arealet no er vekke. Endringane er størst i Nord- Noreg, men den generelle trenden er at breane blir mindre, skriv Solveig Havstad Winsvold, phd-kandidat ved institutt for geovitskap ved UiO, og Liss M. Andreassen frå NVE i magasinet KLIMA, eit magasin om klimaforsking frå CICERO.

 

Klimaendringar

– Isbrear endrar seg i takt med klimaet, og vert difor ofte kalla klimaindikatorar. I framtida vil det bli viktigare med hyppigare kartlegging av breane, fordi det viser seg å vera store og raske endringar i breane frå år til år, skriv forskarane.

Bondhusbreen smelta tilbake to meter i fjor, men heile 303 meter sidan 2000. Gråfjellsbreen ved Folgefonna hadde ein tilbakegang med 120 meter på to år. Tilbakegangen i fjor var den største NVE har registrert, utanom i 2006 då han var noko større. I Hardanger trekte sju brear i snitt seg tilbake med 25 meter i fjor. Senioringeniør Hallgeir Elvehøy og seksjonssjef Rune Engeset ved NVE melder at 33 av 38 brear i Noreg har trekt seg tilbake, medan resten er uendra. Den største tilbakegangen hadde Bødalsbreen ved Jostedalsbreen, med Gråfjellsbreen ved Folgefonna som nummer to i den triste statistikken. Eit interessant funn både forskarar og NVE har gjort er at breane auka på 90-talet. Dette var på grunn av auka vinternedbør desse åra. Men det generelle biletet er altså at dei har minka.