Begge 15-årslaga til NM

Strand-Ulv har vore heilt suverene i kvalifiseringa til årets NM. Alle fire laga som prøvde, har kvalifisert seg til NM.

Tidlegare har J17 og J19 tatt seg vidare til NM. Denne helga var det 15-åringane sin tur, og både gutane og jentene sikra seg billettar til norgesmeisterskapen.

Jentene vann like godt heile turneringa utan å gje vekk eit einaste sett.

– Dette er veldig kjekt. No er det godt med spelarar på alle jentelaga, slik at det er berre ei jente som spelar på to lag. Det betyr at det gror godt på Hatlestrand, Ølve og Varaldsøy, smiler trenar Ragni Hestad.

Ho var opptatt med NM for vidaregåande skular og fekk ikkje vera til stades då laget gjekk til topps i Sveio. Trio kom på sjuande plass, medan Strand-Ulv 2 og Trio 2 vart høvesvis 10 og 12.

Hestad får heller ikkje med seg J15 sine kampar i NM, som går frå 3. til 6. mars.

– Volleyballforbundet trur at det er så mange trenarar tilgjengeleg i denne idretten at dei har lagt NM i U15 og U19 til same helga, høvesvis i Kristiansand og Sandane, sukkar Hestad, som er trenar for alle tre jentelaga.

– Jublar 

Even Måge trenar G15, som noko overraskande fekk plass i NM. Han varslar jubel blant gutane når dei får vita om NM-plassen.

– I utgangspunktet var det dei to beste som gjekk til NM, men me, som bronsevinnarar, får ein bonusplass. Gutane kjem til å bli i ekstase, smiler Måge.

20-åringen har sjølv vore med i sju NM, og har vaksne seks medaljar derifrå.

– Ja, eg har tre med Strand-Ulv og tre med Rossvoll. Sånn sett har eg litt erfaring å dela. Og for gutane blir dette ei super erfaring å ta med seg, seier trenaren.