Askeladden på besøk

Om dei ikkje får halve kongeriket, så er frontfiguren i det minste halvt rosendeling. Laurdag kjem Askeladden på besøk til Snikkeriet.

Johannes Aadland er oppvaksen på Fitjar, men mykje av sommarferiane til den unge Aadland vart brukte hos mormor Helga Mehl i Rosendal.

– På kvar konsert fortel eg om den vakraste plassen i Noreg, og det er sjølvsagt Rosendal. Eg var heldig å vera hos mormor samstundes som det var Baronispel, så eg fekk leika med barna til mange av celebritetane som deltok der. Slikt var spennande for ein fitjarbu, smiler han.

 

Norsk

– Me kjem til Rosendal med fengande pop, og med eit namn som dette må jo det sjølvsagt vera på norsk. Det er historier og tekstar om livet, om det å få det til med middels margin. Det er litt muntermelankolske vriar, skildrar Aadland.

Han jobbar som lærar ved ein skule i Bergen frå måndag til onsdag, medan han prøver å livnæra seg som musikar frå torsdag til laurdag.

– Det er hardt arbeid, men det er kjekt. Ein er sliten når sundagen kjem, men det er verd det, meiner han.

 

Plate nr. 2

– Det plar bli god stemning, og me endar vanlegvis i ei uhøgtidleg form på konsertane, seier vokalisten.

Det tre mann sterke bandet kjem med piano, bass, trommer og sjølvskrivne melodiar.

– No har me vore i studio og spela inn vår andre plate. Plata kjem til neste år, men me kjem med singel alt til hausten, fortel Aadland.

På konsertane er han ikkje framand for å fortelja om då mormor Helga Mehl skaut ein rev heime i tunet.

– Det hender eg introduserer ein melodi om menneskelege revar med den soga. Ho kjøpte forresten dynamitt for skotpremien, og sprengte ein kampestein på garden til pises med det, sluttar han.

Om dynamitten er med i melodien, må du på Snikkeriet på laurdag for å finna ut av.