Allereie ny bru i Ringerike

Ti dagar etter ekstremflaumen 9.august var den øydelagde brua over Ringeriksfossen allereie reparert.

Grunneigarane, turgruppa i Rosendal Turnlag og Kvinnherad Energi gjorde eit spleiselag for å få ho lynkjapt på plass. Onsdag førre veke var tre karar frå Kvinnherad Energi i Ringerike for å ta i mot stokkar som kom opp med helikopter leigd av energiselskapet.

– Helikopteret løfta stolpane rett på plass, fortel Stig Klette.

Kvinnherad Energi sine folk bardunerte og bolta.

– Er det farleg å gjera eit slikt arbeid midt i fossen?

– Det var sleipt og glatt, og hadde vi dotte hadde det ikkje vore bra. Men med vanleg varsemd gjekk det greitt, seier Klette.

Fredag var grunneigar Jens Åge Fossberg, Jens Petter Fossberg, Torbjørn Nordekvål, samt snikkarane Leif Skeie og Samson Olai Kvamme på brua for å leggja plank og gjera ho ferdig.

– Vi fann ut at det var best å leggja plank på raskt, slik at ikkje folk byrja å balansera på stokkane, seier Klette.

Kåre Eik tok eit bilete av den reparerte og oppgraderte brua då Bømlo Turlag gjekk til Bjørndal i helga.

– Dette er ikkje berre reparasjon, men også omfattande sikring av den delen som stod att etter flaumen, seier han.